Bhí vótaíocht ag an reifreann ar siúl Dé hAoine, 24ú Bealtaine 2019. Áiríodh an ráiteas seo a leanas mar
eolas do vótálaithe ar ábhar an reifrinn i mbileog a seoladh chuig gach
toghthóir:
Bille um an Ochtú Leasú is Tríocha ar an mBunreacht (Scaoileadh an Phósta)
2016– páipéar ballóide UAINE
Fiafraítear díot, sa reifreann seo, an aontaíonn tú leis an togra -
(a) chun an mhír seo a leanas a scriosadh as Airteagal 41.3.2° den Bhunreacht:
“i go raibh, ar dháta thionscnamh na n-imeachtaí, tréimhse ceithre
bliana ar a laghad, nó tréimhsí ceithre bliana ar a laghad san iomlán,
caite ag na céilí ina gcónaí ar leithligh óna chéile le linn na gcúig
bliana roimhe sin,”, agus
(b) chun an fo-alt seo a leanas a scriosadh as Airteagal 41.3 den Bhunreacht:
“3° I gcás pósadh duine ar bith a scaoileadh faoi dhlí shibhialta aon Stáit
eile agus an pósadh sin, agus bail dlí air, a bheith ann fós faoin dlí a
bheas i bhfeidhm in alt na huaire taobh istigh de dhlínse an Rialtais
agus na Parlaiminte a bhunaítear leis an mBunreacht seo, ní
fhéadfaidh an duine sin pósadh ar a mbeadh bail dlí a dhéanamh
taobh istigh den dlínse sin an fad is beo don duine eile a bhí sa
chuing phósta a scaoileadh amhlaidh.”,
agus an méid seo a leanas a chur in ionad an fho-ailt sin:
“3° Féadfar socrú a dhéanamh le dlí chun aitheantas a thabhairt faoi dhlí
an Stáit do scaoileadh ar phósadh arna thabhairt faoi dhlí sibhialta
stáit eile.”.
