Reifreann ar an mBille um an gCeathrú Leasú is Tríocha ar an mBunreacht (Comhionannas Pósta) 2015

Bhí vótaíocht ag an reifreann ar siúl Dé hAoine, 22ú Bealtaine, 2015. Bhí reifreann ar Aois Iarrthóra an Uachtaráin ar an lá céanna. Áiríodh an ráiteas seo a leanas mar eolas do vótálaithe ar ábhar an reifrinn i mbileog a seoladh chuig gach toghthóir: An Bille um an gCeathrú Leasú is Tríocha ar an mBunreacht, 2015– Páipear ballóide BÁN. Fiafraítear díot sa reifreann seo an aontaíonn tú leis an togra chun Airteagal 41 den Bhunreacht a leasú chun a fhoráil go bhféadfaidh beirt pósadh, gan beann ar a ngnéas. Leanfar den phósadh a rialáil le reachtaíocht agus leis an dlí coiteann. Beartaítear leis an mBille um an gCeathrú Leasú is Tríocha ar an mBunreacht (Comhionannas Pósta), 2015 an t-alt seo a leanas a chur isteach i ndiaidh alt 3 d’Airteagal 41 den Bhunreacht: “4. Féadfaidh beirt, gan beann ar a ngnéas, conradh pósta a dhéanamh de réir dlí.”