Reifreann ar an mBille um an Tríú Leasú is Tríocha ar an mBunreacht (An Chúirt Achomhairc) 2013

Bhí vótaíocht ag an reifreann ar siúl Dé hAoine, 4ú Deireadh Fómhair, 2013. Bhí reifreann ar Dhíothú Sheanad Éireann ar an lá céanna. Áiríodh an ráiteas seo a leanas mar eolas do vótálaithe ar ábhar an reifrinn i mbileog a seoladh chuig gach toghthóir: “An Bille um an Tríú Leasú is Tríocha ar an mBunreacht, 2013 Fiafraítear díot an aontaíonn tú leis an togra - (a) chun an Bunreacht a leasú chun cúirt dar teideal an Chúirt Achomhairc a bhunú, (b) dá dhroim sin, chun forálacha eile den Bhunreacht a leasú, go háirithe na forálacha a bhaineann le dlínse na Cúirte Uachtaraí chun achomhairc in aghaidh breitheanna ón Ard-Chúirt agus ó chúirteanna eile a éisteacht agus a chinneadh, agus (c) chun fo-alt 5° d’Airteagal 34.4 den Bhunreacht, ar a dtugtar riail “an aon bhreithiúnais amháin”, a scriosadh, ar fo-alt é a bhaineann le breitheanna ón gCúirt Uachtarach ar cheist i dtaobh dlí a bheith bailí nó gan a bheith bailí ag féachaint d’fhorálacha an Bhunreachta.”